Ranjangaon Ganpati Temple: రంజన్ గావ్ మహాగణపతి ఆలయం

 

అష్టవినాయక క్షేత్రాలలో ఎనిమిదో క్షేత్రమైన రంజన్ గావ్ మహాగణపతి క్షేత్రం మహారాష్ట్రలోని పూణే జిల్లాలోని షిరూర్ తాలూకాలోని రంజన్ గావ్ అనే గ్రామంలో ఉంది. ఈ ఆలయం 9 - 10 శతాబ్దాల మధ్య నిర్మించినట్లు తెలుస్తోంది. అయితే 18 వ శతాబ్దంలో పేష్వాలు ఈ ఆలయాన్ని పునర్నిర్మించారు.

గణేశ పురాణం ప్రకారం త్రిపురాసుర సంహారం చేసే సమయంలో సాక్షాత్తూ పరమశివుడు యుద్ధం ప్రారంభించేముందు విఘ్నాలు తొలగేందుకు ఇక్కడ గణపతిని ప్రతిష్ఠించి పూజించాడంట! మహాదేవుడు ప్రతిష్ఠించిన గణపతి కాబట్టి ఈ గణనాథునికి మహాగణపతి అని పేరు వచ్చిందని ఆలయ స్థల పురాణం ద్వారా మనకు తెలుస్తోంది.

రంజన్ గావ్ మహాగణపతి ఆలయంలో సిద్ధి, బుద్ధి సమేతుడై పద్మంలో కొలువు తీరి ఉంటాడు. అయితే అక్కడి స్థానికుల కథనం ప్రకారం ప్రస్తుతం ఉన్న వినాయకుని విగ్రహం క్రింద పది తొండాలు, ఇరవై చేతులు గల వినాయకుడి విగ్రహం ఉందని, దాని పేరు మహోత్కట్ గణపతి అని అంటారు. అయితే ఆలయ ధర్మకర్తలు మాత్రం అది నిజం కాదని చెబుతారు. ఈ విషయంపై మరింత లోతుగా పరిశోధనలు జరగాల్సి ఉంది.

ఇక ఈ గణపతి ఆలయంలో దక్షిణాయనంలో సూర్యకిరణాలు నేరుగా స్వామిపై పడేలాగా ఆలయాన్ని నిర్మించడం ఈ ఆలయ ప్రత్యేకత.

సాక్షాత్తూ పరమశివుడే శత్రుసంహారం ముందు పూజించిన గణపతి కాబట్టి ఈ ఆలయంలో గణపతిని దర్శించి పూజిస్తే శత్రుజయం కార్యసిద్ధి కలుగుతాయని విశ్వాసం. అంతేకాదు మొదలుపెట్టిన పనులు ఎలాంటి ఆటంకాలు లేకుండా పూర్తవుతాయని కూడా నమ్మకం.

నిత్యం భక్తులతో రద్దీగా ఉండే మహాగణపతి ఆలయంలో త్రికాల హారతులు, అర్చనలు జరుగుతాయి. ప్రతి బుధవారం, ఆదివారం స్వామివారికి విశేష అభిషేకాలు కూడా జరుగుతాయి. ప్రతినెలా వచ్చే సంకష్టహర చవితి రోజు స్వామికి విశేష పూజలు, అభిషేకాలు జరుగుతాయి. ఇక వినాయక చవితి పండుగ సందర్భంగా 10 రోజుల పాటు ఘనంగా ఉత్సవాలు జరుగుతాయి. ఈ ఉత్సవాలు తిలకించడానికి దేశం నలుమూలల నుంచి భక్తులు విశేషంగా తరలి వస్తారు.